တစ်ချောင်း ၁၀၀ ကျပ်နဲ့ ရောင်းချပေးနေတဲ့ ငရုတ်သီး ၀က်သားတုတ်ထိုးဆိုင်

ဒီတစ်ခေါက်မှာ ဝက်သားတုတ်ထိုးကြိုက်တဲ့သူတွေအတွက် အသစ်စက်စက်ဆိုင်လေးတစ်ဆိုင်နဲ့ မိတ်ဆက်ပေးချင်ပါတယ်။ လှည်းတန်း ကျောင်းရှေ့မှတ်တိုင်အနီးက အဝေရာလမ်းထဲမှာရှိတဲ့ “ ငရုတ်သီး” ဆိုတဲ့ဆိုင်လေးပါ။

ဆိုင်ရဲ့ ထူးခြားချက်တစ်ခုကို အရင်ဆုံးစပြောရရင် ဒီဆိုင်က ရှိသမျှတုတ်ထိုးအားလုံးက တစ်ချောင်းကို ၁၀၀ ကျပ်ပဲရှိတာပါ။ တစ်ချောင်း ၁၀၀ ဆိုလို့ ပါးပါးလှီးထားတာမဟုတ်ပဲ ပုံမှန်တုတ်ထိုးဆိုဒ်ပြည့်ပြီး ရွေးချယ်စရာအစုံလည်းရှိပါတယ်။ ကိုယ့်စိတ်ကြိုက်ရွေးချယ်ပြီး ခုံမှာအေးဆေးထိုင်စားရတာကိုလည်း သဘောကျမိတယ်။

နောက်တစ်ခုက ဝက်သားတုတ်ထိုးကြော် ကိုလည်း သဘောကျမိတယ်။ အဆီတွေအခေါက်တွေစုကြော်ထားတာမဟုတ်ပဲ စားကောင်းတဲ့ အစိတ်အပိုင်းတွေကို ကြော်ထားတာကြောင့် ဒါကိုလည်းပဲ သဘောကျမိတယ်။

ဝက်သားဟင်းရည်က စိတ်ကြိုက်ယူလို့ရပြီး အပူပေးထားတဲ့အိုးနဲ့ စနစ်တကျထားပေးထားတာတွေ့ရပါတယ်။ ဒီဟင်းရည်ကို သဘောကျမိတာက အခြားတုတ်ထိုးဆိုင်တွေရဲ့ ဟင်းရည်လို အဆီတွေဝေ့ဝဲနေတာမျိုးမဟုတ်ပဲ အချိုရည်သီးသန့်နဲ့ သောက်လို့ကောင်းပြီး မအီတဲ့ဟင်းရည်မျိုးဖြစ်ပါတယ်။

ဆိုင်ဖွင့်ဖွင့်ပြီးချင်းမှာ ဒီဆိုင်နဲ့အတူ နာမည်ရလာတာက မန်းကျည်းအချဉ်ပါ။ ချဉ်ချဉ်စပ်စပ်အရသာနဲ့ မန်ကျည်းအနှစ်နဲ့ ဖျော်ထားပြီး တုတ်ထိုးနဲ့တွဲစားရတာအရသာပိုရှိပါတယ်။ နောက်အချဉ်တစ်ခုကတော့ ငရုတ်ဆီအချဉ်ပါ။ သခွားသီးနဲ့ ဆလတ်ရွက်ကိုလည်း အခမဲ့တွဲချပေးပါတယ်။

ဆိုင်ရဲ့ရောင်းရငွေ ၅ ရာခိုင်နှုန်းကို မုဒိတာပရဟိတအဖွဲ့ကို ပြန်လည်လှူဒါန်းတယ်လို့ သိရပါတယ်။ အမြတ်ငွေနည်းနည်းနဲ့ များများရောင်းချင်တဲ့ရည်ရွယ်ချက်နဲ့ ဒီလိုဈေးနှုန်းသက်သက်သာသာနဲ့ သပ်သပ်ရပ်ရပ်ရောင်းချတဲ့ဆိုင်လေးဆိုတော့ ပိုပြီး သဘောကျမိပါတယ်။