သင့်ရဲ့ စားသောက်ဆိုင်သန့်ရှင်းဖို့လိုအပ်သည်

စားသောက်ဆိုင်လုပ်ငန်းတစ်ခု အောင်မြင်ဖို့ဆိုတာ တကယ်တော့ စိန်ခေါ်မှုကြီးမားလှပါတယ်။ အထူးသဖြင့် ဈေးကွက်ပြိုင်ဆိုင်မှုများလာတဲ့ ယနေ့ခေတ်မှာ ရွေးချယ်စရာ လမ်းကြောင်းများသလောက် အောင်မြင်မှုရဖို့ဆိုတာ အတော်အတန်ကို ခက်ခဲတယ်လို့ဆိုရပါမယ်။

လုပ်ငန်းတစ်ခုကိုရွေးချယ်တော့မယ်ဆိုရင် သူများတွေအဆင်ပြေနေပေမယ့် ကိုယ့်အတွက် အဆင်မပြေနိုင်တာမျိုးလည်းကြုံတွေ့ရနိုင်ပါတယ်။ ငါးပွက်ရာငါးစာချတိုင်းလည်း သူများအောင်မြင်သလို ကိုယ်အောင်မြင်နိုင်ဖို့မလွယ်ပါဘူး။

ကိုယ်ရဲ့ကိုယ်ပိုင်ဆုံးဖြတ်ချက်နဲ့ ကိုယ့်ရွေးချယ်ခဲ့တဲ့ စားသောက်ဆိုင်လုပ်ငန်းတစ်ခုက ကိုယ့်ဝါသနာအရသော်လည်းကောင်း၊ ဈေးကွက်ကျွမ်းကျင်မှုအရသော်လည်းကောင်းမရှိခဲ့ရင် ရေရှည်ရပ်တည်နိုင်ဖို့နဲ့ အောင်မြင်ဖို့မလွယ်ကူနိုင်ပါဘူး။

စားသုံးသူတစ်ယောက်ဟာ ဆိုင်တစ်ဆိုင်ရဲ့ တန်ဖိုးကို သတ်မှတ်တဲ့နေရာမှာ အဓိကကျတဲ့အခြေခံအချက်အနေနဲ့ အရည်အသွေးနဲ့ သန့်ရှင်းသပ်ရပ်မှုကို စပြီးထိုင်းထွာမှာပါ။ ပြီးမှ ၀န်ဆောင်မှုနဲ့ စိတ်တိုင်းကျစရာအနေအထားရှိ၊ မရှိကိုသတ်မှတ်ကြလေ့ရှိပါတယ်။

ဆိုင်တစ်ဆိုင်ရဲ့ အစားအသောက်ဘယ်လောက်ကောင်းပါတယ်ဆိုပါစေ သန့်ရှင်းမှုမရှိတဲ့ အပြင်အဆင်နဲ့အစားအသောက်တွေကိုတော့ ဘယ်သူမှစားချင်ကြမှာမဟုတ်ပါဘူး။ မလွဲသာလို့ဝင်မိလို့သာ စားလိုက်ရတယ် နောက်တစ်ခေါက်ပြန်လာမှာမဟုတ်ပါဘူး။ သန့်ရှင်းသပ်ရပ်ပြီး စားသုံးသူရဲ့ ကျန်းမာရေးထောက်ခံချက်ကို အပြည့်ဝအာမခံချက်ပေးပြီး စေတနာပါပါချက်ပြုတ်ထားကြောင်းကို ထင်သာမြင်သာရှိအောင်ပြထားခြင်းက စားသုံးသူတွေကို ဆွဲဆောင်နိုင်ပါတယ်။

အစားအသောက်တော့ကောင်းပါရဲ့သားနဲ့ သန့်ရှင်းမှုအားနည်းမှုကြောင့် စားသုံးသူတွေလက်ရှောင်တဲ့ ဆိုင်တော်တော်များများရှိပါတယ်။ မသိသာမထင်ရှားတဲ့ ဆိုင်ရဲ့ အားနည်းချက်တစ်ခုက စားသောက်ဆိုင်စီးပွားရေးလုပ်ငန်းတစ်ခုကို သိသိသာသာကြီး အကျိုးသက်ရောက်မှုရှိနိုင်ပါတယ်။ အသေးစိတ်ပြောရရင် ၀န်ဆောင်မှုပေးနေတဲ့ ၀န်ထမ်းတစ်ဦးချင်းစီရဲ့ တစ်ကိုယ်ရည်သန့်ရှင်းမှုကလည်း အလွန်မှအရေးပါလှပါတယ်။